သီတဂူကျောင်းသားဖိုရမ်သည် ရပ်ဝေးမြေခြား သီတဂူကျောင်းသားများအတွက် ဆုံဆည်းရာဖိုရမ်ဖြစ်သောကြောင့် ညစ်ညမ်းသော ပုံများနှင့် စာများရေးသားခြင်း
မပြုလုပ်ကြပါရန် မေတ္တာရပ်ခံအပ်ပါသည်။(မော်နီတာ)



 
HomeHome  GalleryGallery  FAQFAQ  PublicationsPublications  CalendarCalendar  SearchSearch  MemberlistMemberlist  UsergroupsUsergroups  RegisterRegister  Log inLog in  

Share | 
 

 အဘိဓမ္မာ အကျဉ်းချုပ်

Go down 
AuthorMessage
pannasiri

avatar

Posts : 10
Join date : 2013-07-29
Age : 34

PostSubject: အဘိဓမ္မာ အကျဉ်းချုပ်   Sun Aug 11, 2013 12:39 pm



မြတ်စွာဘုရားရှင် အလောင်းတော်ကို မဟာ သက္ကရာဇ် ၆၈ ခု၊ ကဆုန်လပြည့်နေ့တွင် မိခင် မာယာဒေ၀ီမှ ဖွားမြင်တော်မူခဲ့ပါသည်။ အသက် (၂၉)နှစ်အရွယ်တွင် နန်းစည်းစိမ်နှင့်တကွ အားလုံး ကို စွန့်လွှတ်ကာ ဥရုဝေလ တောသို့ဝင်ခဲ့ပါသည်။ ဥရုဝေလတောတွင် ပင်ပန်း ဆင်းရဲ လှသော ဒုက္ကရ စရိယ အကျင့်ကို ၆နှစ် ကာလပတ်လုံး ကျင့်ခဲ့ ပါသည်။ နောင်တွင် ထိုအကျင့် များကို စွန့်လွှတ်ပြီး မဇ္ဈိမပဋိပဒါ ဟူသော မဂ္ဂင်ရှစ်ပါး အကျင့်ကို ကိုယ်တော် တိုင် ကျင့်သုံး တော်မူခဲ့ပါသည်။ ထိုမဂ္ဂင်ရှစ်ပါး အကျင့်ဖြင့် ဂေါတမ ဘုရားရှင်သည် မဟာသက္ကရာဇ် (၁၀၃)ခုနှစ်၊ ကဆုန်လပြည့်နေ့တွင် သမ္မာသမ္ဗုဒ္ဓ ဘုရားအဖြစ်သို့ ရောက်ရှိတော်မူခဲ့ ပါသည်။ ဘုရားဖြစ်ပြီးနောက် - သတ္တမ ၀ါကို တာဝတိံသာ နတ်ပြည်မှာ ၀ါကပ်တော်မူပြီး မယ်တော်ဖြစ်ခဲ့ဖူးသော သန္တုဿိတ နတ်သားကို အမှူး ထားကာ တာဝတိံတာနတ်ပြည်ရှိ ပင်လယ် ကသစ်ပင်ရင်း ပဏ္ဍုကမ္ဗလာ မြကျောက်ဖြာ ထက်တွင် အဘိဓမ္မာ ဒေသနာ တော်ကို ရက်ပေါင်း (၉၀) ၀ါတွင်းသုံးလပတ်လုံး အသံမစဲ ဟောတော်မူ ပါသည်။ အဘိဓမ္မာတရား ဒေသနာ တော်ကို နည်း (၃) နည်း ဖြင့် ဟောကြား ခဲ့ပါသည်။
အကျယ်နည်း - ဗုဒ္ဓမြတ်စွာသည် မယ်တော်ကို ကျေးဇူးဆပ်လိုခြင်း၊ မိဘကျေးဇူးကို သတ္တ၀ါတို့ နားလည်စေလိုခြင်း၊ အဘိဓမ္မာတရားကို အစအဆုံး တထိုင်တည်း ဟောကြားလိုခြင်း၊ အဘိဓမ္မာ ဒေသနာတော်၏ ကျယ်ဝန်းနက်နဲမှုကို သိစေလိုခြင်း၊ လူတို့သက်တမ်းနှင့် သုံးလလောက်ဟောမှ ကုန်နိုင်မည့် တရားဖြစ်သည့် အတွက် လူတို့ ဣရိယာပုထ်ဖြင့် ဟောသူရော နာသူပါ မနေနိုင်ခြင်း တို့ကြောင့် အဘိဓမ္မာ အကျယ်နည်းကို တာဝတိံသာနတ်ပြည်၌ ဟောရခြင်း ဖြစ်ပါသည်။
အကျဉ်းနည်း - မြတ်စွာဘုရားသည် လူသား ဖြစ်တော် မူသည့်အတွက် ဆွမ်းခံခြင်း ဆွမ်းစားခြင်း ရေချိုး သန့်စင်ခြင်း စသည် ပြုလုပ်ရန် နိမ္မိတရုပ်ပွားတော်ကို အဓိဋ္ဌာန်ဖြင့် ဖန်ဆင်းပြီး လူ့ပြည်သို့ ကြွတော်မူရာတွင် ဟိမ၀န္တာစန္ဒကူးတော၌ နေ့သန့်စင် (အနားယူ) တော် မူခိုက် မြတ်စွာဘုရားက ရှင် သာရိပုတ္တရာအား အဘိဓမ္မာ တရားကို အကျဉ်းချုပ် နည်းဖြင့် ဟောတော်မူပါသည်။
မကျဉ်းမကျယ်နည်း - အရှင်သာရိပုတ္တရာက မြတ်စွာ ဘုရား ဟောခဲ့သည့် အကျဉ်းနည်းကို တပည့် ရဟန်း ငါးရာတို့အား မကျဉ်းမကျယ်နည်းဖြင့် ပြန်လည် ဟောတော် မူပါသည်။ နောက်တနေ့တွင် အရှင် သာရိပုတ္တရာက တပည့်ရဟန်း ငါးရားကို ဟောကြားသော အဘိဓမ္မာ ဒေသနာတော်အား မြတ်စွာဘုရားထံမှောက်၌ ပြန်လည်တင်ပြ အစစ်ဆေးခံကာ အတည်ပြုချက် ယူတော်မူ ခဲ့ပါသည်။
ဤသို့ဖြင့် အဘိဓမ္မာ ဒေသနာတော်ကြီးသည် ခုနစ်ဝါ မြောက်ဖြစ်သော မဟာသက္ကရာဇ် ၁၀၉ ခု ၀ါဆိုလပြည့် ကျော်(၁) ရက် မှ သီတင်းကျွတ်လပြည့် နေ့အထိ (၃)လ အတွင်း နည်း(၃)နည်းဖြင့် လူ့ပြည်၊ နတ်ပြည် တပြိုင်တည်း ပေါ်ထွန်းခဲ့ပါသည်။ ဗုဒ္ဓမြတ်စွာ ဘုရားရှင် သည် အဘိဓမ္မာဒေသနာတော်ကို ဟောကြားပြီး တာဝတိံသာနတ်ပြည်မှ သင်္ကဿ နဂိုရ်ပြည်သို့ သီတင်းကျွတ်လပြည့်နေ့တွင် ဆင်းသက်တော် လာသည်ကို ရည်စူးပြီး ဘုရားရှင်အား ပူဇော်သော အားဖြင့် ဆီမီးထွန်းကာ မီးထွန်းပွဲ ကျင်းပသော အစဉ် အလာသည် ရှေးဘိုးဘေများ လက်ထက်ကပင် ရှိခဲ့ ပါသည်။ ထို့အပြင်ဘုရားရှင်သည် မယ်တော် ဖြစ်ခဲ့ဖူးသော နတ်သားကို တာဝတိံသာ နတ်ပြည်၌ အဘိဓမ္မာခုနှစ်ကျမ်းကို ဟောကြားတော် မူပြီးနောက် သီတင်းကျွတ်လပြည့်နေ့တွင် လူပြည်သို့ သက်ဆင်း တော်မူသည်ကို အကြောင်းပြုလျှက် ဤနေ့ကို “အဘိဓမ္မာအခါတော်နေ့” ဟု သမုတ်ကာ အဘိဓမ္မာ ရွတ်ဖတ်ပူဇော်ပွဲများလည်း ကျင်းပကြပါသည်။
အဘိဓမ္မာတရားတော်ကို တစ်နေရာတည်း၌ တစ်ဆက် တည်း ဟောကြားသော တရားရှည်ကြီး တစ်ပုဒ် ဖြစ်သော်လည်း ဟောပုံဟောနည်းအမျိုးမျိုးကို သုံး၍ ဟောကြားထားသဖြင့် ဟောနည်းအရ ကျမ်းခုနှစ်ကျမ်း ခွဲခြားထားပါသည်။
အဘိဓမ္မာပါဠိတော် ၇-ကျမ်း
ဓမ္မသင်္ဂဏီ, ၀ိဘင်း, ဓာတုကထာ, ပုဂ္ဂလပညတ်, ကထာဝတ္ထု, ယမိုက်, ပဋ္ဌာန်း
အဘိဓမ္မာသင်္ဂြိုဟ်ကျမ်း
ထိုသို့ ကျယ်ဝန်းလှသော အဘိဓမ္မာပိဋက၏ အနှစ် သာရကို ထုတ်နှုတ်၍ အဘိဓမ္မာ၏ သဘောသရုပ်ကိုရဟန်း ရှင် လူအပေါင်းတို့ အလွယ်တကူ လေ့လာ ဆည်းပူးနိုင်ရန်အလို့ငှာ အိန္ဒိယနိုင်ငံတောင်ပိုင်း ကဉ္စိပူရအရပ်တွင် သီတင်းသုံးတော်မူခဲ့ဖူးသော အရှင် အနုရုဒ္ဓါမထေရ်က သီဟိုဠ်ကျွန်းဝယ် သီတင်းသုံးခိုက် အဘိဓမ္မတ္ထသင်္ဂဟ အမည်ရှိသော အဘိဓ္မာအဖွင့် ကျမ်းတစ်စောင်ကို ပြုစုတော်မူခဲ့ပါသည်။
(အဘိဓမ္မတ္ထသင်္ဂဟ = အဘိဓမ္မ + အတ္ထ + သံ + ဂဟ = အဘိဓမ္မာဒေသနာတော်၏ + အနက် အဓိပ္ပါယ် အကျယ် များကို + အကျဉ်းချုံး၍ + ယူရာဖြစ်သောကျမ်း။ သင်္ဂဟ ကို သက္ကတဘာသာဖြင့် သံဂြဟ ဟု ရေး၏။ မြန်မာတို့က သင်္ဂြိုဟ် ဟု ဝေါဟာရပြုလိုက်ပါသည်။ အကျဉ်းချုံး၍ အနှစ်ထုတ်ယူခြင်း ဟု အဓိပ္ပာယ်ရပါသည်။)
ထိုကျမ်းငယ်လေးအား သင်္ဂြိုဟ် ၉-ပိုင်းခေါ် အောက်ပါ အခန်း ၉-ခန်းဖြင့် ဖွဲ့စည်းထားပါသည်။
၁။ စိတ်ပိုင်း- စိတ် အကျဉ်း ၈၉-ပါး၊ အကျယ် ၁၂၁-ပါးကို ပြသော အခန်း
၂။ စေတသိက်ပိုင်း - စေတသိက် ၅၂-ပါးနှင့် စိတ်-စေတသိက်တို့ယှဉ်ပုံပြသော အခန်း
၃။ ပကိဏ်းပိုင်း - စိတ်, စေတသိက်တို့ကို ဝေဒနာ, ဟိတ်, ကိစ္စ, ဒွါရ, အာရုံ, ၀တ္ထုအားဖြင့် အထွေထွေ အလီလီ ခွဲခြားဝေဖန်ပြသော အခန်း
၎။ ၀ီထိပိုင်း - ဒွါရခြောက်ပါးတွင် ၀ီထိ ခေါ် သိစိတ် အစဉ်တို့ဖြစ်ပေါ်ပုံ စိတ္တနိယာမကို ပြသောအခန်း
၅။ ၀ီထိမုတ်ပိုင်း – ရှေ့အခန်းတွင်ပြခဲ့သော ၀ီထိတို့မှ လွတ်နေသော ဘ၀င်, စုတိ, ပဋိသန္ဓေအခိုက်တို့၌ စိတ်အစဉ်ဖြစ်ပုံ ပြသော အခန်း
၆။ ရုပ်ပိုင်း - ရုပ် ၂၈-ပါး၊ ရုပ်ဖြစ်ပုံ၊ ရုပ်အစဉ်နှင့် နိဗ္ဗာန်အကြောင်းတို့ကို ဖော်ပြသော အခန်း
၇။ သမုတ်စည်းပိုင်း - စိတ်, စေတသိက်, ရုပ်, နိဗ္ဗာန်တို့အား အဘိဓမ္မာကျမ်းကြီးများတွင်ကဲ့သို့ ခန္ဓာ, အာယတန, ဓာတ်စသဖြင့် အုပ်စုဖွဲ့စည်းပြသော အခန်း
၈။ ပစ္စည်းပိုင်း - အကြောင်းအကျိုးဆက်နွယ်ပုံတို့ကို ပဋိစ္စသမုပ္ပါဒ်နည်း၊ ပဋ္ဌာန်းနည်းဖြင့် ပြသော အခန်း
၉။ ကမ္မဋ္ဌာန်းပိုင်း - သမထ, ၀ိပဿနာကမ္မဋ္ဌာန်းတို့ကို ပြသော အခန်း
အဘိဓမ္မာပါဠိတော်၊ အဋ္ဌကထာကြီးများအား မလေ့လာမီ၊ အဘိဓမ္မာ အခြေခံရစေရန် သင်္ဂြိုဟ်ကို လေ့လာ ကြရ သည်။ သင်္ဂြိုဟ်ကျမ်းတွင် “အဘိဓမ္မာတွင် စိတ်, စေတသိက်, ရုပ်, နိဗ္ဗာန်” ဟူသော ပရမတ္ထအပြား လေးပါးရှိသည်” စသဖြင့် အကျဉ်းအားဖြင့် ခြုံငုံ ဖော်ပြ သဖြင့် စတင်လေ့လာ သူတို့အတွက် လွယ်ကူစေသည်။ ထို့ကြောင့် သင်္ဂြိုဟ် ကျမ်းအား “အဘိဓမ္မာသင်ပုန်းကြီး” ဟုလည်း ခေါ်ဝေါ်ကြသည်။

ရေးသားပူဇော်သူ
ဦးအံ့ထူးနိုင်
အဘိဓမ္မာအသင်းကြီး

Back to top Go down
http://pannasiri.blog.com
 
အဘိဓမ္မာ အကျဉ်းချုပ်
Back to top 
Page 1 of 1

Permissions in this forum:You cannot reply to topics in this forum
 :: သီတဂူကမ္ဘာ့ဗုဒ္ဓတက္ကသိုလ် :: GENERAL-
Jump to: